Prokurorluq Paşinyanın ifadəsini almalıdır

Müxalifət deputatları baş nazirin şifahi əmrindən sonra Ermənistan silahlı qüvvələrinin sərhəd bölgələrindən çıxarılmasını, eləcə də təkbaşına qərar qəbul edilməsini qəbuledilməz hesab edirlər.

Xural.com Sputnik Armeniyaya istinadən xəbər verir ki, Prokurorluq baş nazir Nikol Paşinyanın Sünikdən (Qaragöl) erməni qoşunlarının çıxarılması əmrini verməzdən əvvəl Təhlükəsizlik Şurasının iclasını çağırmadığı barədə son bəyanatının izinə düşməlidir. Bunu parlamentdə keçirdiyi brifinqdə “Hayastan” (Ermənistan) fraksiyasının deputatı Aram Vardevanyan deyib: “Əgər biz hüquqi və demokratik dövlətdə yaşasaydıq, prokurorluq artıq bu bəyanatla bağlı materiallar hazırlamağa başlayardı.

Öz növbəsində, “Hayastan” (“Ermənistan”) fraksiyasının rəhbəri, keçmiş müdafiə naziri Seyran Ohanyan bəyan edib ki, dövlət sərhədi ilə bağlı bütün hərəkətlər yazılı əmr əsasında, onun biliyi və icazəsi ilə müvafiq orqanlarda həyata keçirilməli idi. Onun sözlərinə görə, komandanlıq orqanının formalaşdırılması, Təhlükəsizlik Şurasının iclasının çağırılması, orada qoşunların çıxarılması ilə bağlı yazılı və ya şifahi göstəriş verilməsi lazım idi.
Ohanyanın fikrincə, normal idarəçi ən əlverişli yüksəklikləri tutmağı əmr edər, düşmənin Ermənistan ərazisinə soxulmasına və mövqelərini təchiz etməyə imkan verməzdi.
Öz növbəsində, “Mənim Şərəfim” blokunun nümayəndəsi Tiqran Abramyan Paşinyanın Ermənistan qoşunları geri çəkilməsəydi, müharibənin başlayacağı barədə bəyanatını qəbuledilməz hesab edib. Bu kontekstdə Abrahamyan vurğulayıb ki, eyni şifahi əmrlə Qubadlı (Sanasar) və Zəngilan (Kövsakan) Azərbaycan tərəfinə keçib, 9 noyabr tarixli üçtərəfli sazişdə belə qeyd olunmayıb.
“Bu ərazilər bizim nəzarətimizdə olub və təslim oluna bilməz. Bu, Gorus-Qafan (Qoris-Kapan) yoluna da aiddir, onun təslim olunması ilə bağlı da danışıqlar aparılmayıb”, – Abrahamyan bildirib.
Xatırladaq ki, 44 günlük müharibə nəticəsində Dağlıq Qarabağın böyük hissəsi Azərbaycan tərəfindən işğaldan azad edilib. Bunun ardınca Ermənistanla Azərbaycan arasında sərhədlərin dəqiqləşdirilməsi prosesi başlayıb. Nəticədə Qaragöl (Sünik) bölgəsində  və Ermənistanı İranla birləşdirən Gorus-Qafan avtomobil yolu tamamilə Azərbaycanın nəzarətinə keçib.