Qubad İbadoğlu təqsirləndirilən şəxs kimi dindirilib, ona verilən ittiham ağırlaşdırılıb
Yayımlandı: 24 İyul 2023 15:42
ADR sədri hazırda məhkəməyə aparılıb
Azərbaycan Demokratiya və Rifah Partiyasının sədri, iqtisadçı Qubad İbadoğlu iyulun 24-də günorta saatlarında təqsirləndirilən şəxs qismində dindirilib. Bu zaman şübhəli şəxs qismində dindirilərkən ona Cinayət Məcəlləsinin 204.1 (Saxta pul və ya qiymətli kağızlar hazırlama, əldə etmə və ya satma) maddəsilə verilən ittiham da ağırlaşdırılıb. Qubad İbadoğluya qarşı Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma – mütəşəkkil dəstə tərəfindən törədildikdə) maddəsilə ittiham irəli sürülüb. İstintaq dövründə onun həbsdə saxlanması üçün məhkəməyə təqdimat verilib.
Qubad İbadoğlu barəsində həbs qətimkan tədbirinin seçilməsi məsələsinə Nərimanov Rayon Məhkəməsində baxılacaq.
Təqdimatda Qubad İbadoğlu barəsində ilkin istintaq dövrü üçün 4 aylıq həbs qətimkan tədbiri seçilməsi istənilib.
ADR sədri hazırda məhkəməyə aparılıb.
Cinayət Məcəlləsinin 204.3.1 maddəsində 8 ildən 12 ilə qədər azadlıqdan məhrumetmə cəzası nəzərdə tutulub.
Qubad İbadoğlu özünü təqsirli bilmir, ittihamı rədd edir. O, birbaşa Prezident İlham Əliyevin sifarişiylə həbs olunduğunu bildirib.
