Media Hüququ İnstitutu: «Üç ayda mediadan 2 milyon manat pul istənilib»

Aprelin 19-da Media Hüququ İnstitutu mətbuat konfransı keçirib. Mətbuat konfransı zamanı MHİ 2012-ci ilin yanvar-mart aylarını əhatə edən hesabatını açıqlayıb: «2012-ci ilin yanvar-mart aylarında mediadan istənilən kompensasiyanın ümumi məbləği 2 milyon 850 manat, ödəməsi üçün məhkəmə tərəfindən qoyulan öhdəlik isə 58 min manat olub. Ötən 3 ayda media, jurnalistlərlə bağlı 15 iddia və şikayət məhkəmə icraatına qəbul edilib. Beş iş (müdafiə nazirinin müavini «Yeni Müsavat»a qarşı, Müdafiə Nazirliyinin maliyyə idarəsinin rəisi «Yeni Müsavat»a qarşı, Naxçıvan Ordu Korpusunun Qərargah rəisi «Yeni Müsavat»a qarşı, Lənkəran ruhaniləri «Xural»a qarşı, ANS telekanalının vitse-prezidenti Elşad Xoseyə qarşı) xüsusi ittiham qaydasında qaldırılıb».

MHİ: «6 JURNALİST HƏBSDƏDİR»

Dörd hissədən ibarət olan hesabatda jurnalistlərin həbsi bölməsində qeyd olunur ki, hazırda «Xural» qəzetinin baş redaktoru Əvəz Zeynallı, qəzetin bölgə müxbiri Aydın Canıyev, dini məzmunlu islamazeri.org saytının baş redaktoru Ramin Bayramov, İranın «Səhər» telekanalının Bakı reportyoru Anar Bayramlı, Qubadakı regional «Xəyal» televiziyasının icraçı direktoru Vüqar Qonaqov və baş redaktoru Zaur Quliyev daxil olmaqla altı jurnalist həbsdədir.

Hesabatda qeyd olunur ki, jurnalistlərə qarşı irəli sürülən rəsmi ittihamların əksəriyyəti onların peşə fəaliyyəti ilə bağlı deyil:

«Həbsdəki jurnalistlər rüşvət almaqda, vergidən yayınmaqda, xuliqanlıqda, narkotik, qanunsuz  odlu silah əldə etmədə, ictimai qaydanın pozulmasına səbəb olan hərəkətləri təşkil etmədə və  vəzifə səlahiyyətlərini aşmaqda ittiham olunurlar».

Hesabata görə, son 3 ayda media, jurnalistlər ən azı 30 dəfə fiziki, psixoloji basqılara, hədələməyə, texniki əngəllərə məruz qalıb. Basqıyla üzləşən jurnalistlərin əksəriyyəti tənqidi məzmunları ilə seçilirlər. İnstitutun hesabatına əsasən, Azərbaycanda bilgi azadlığını tənzimləyən «İnformasiya əldə etmək haqqında» Azərbaycan Respublikasının Qanununun işləməsində problemlər qalmaqda davam edir. Bilgilərin açıqlığı 25-30 faiz civarındadır.