İraqda məhbus həyatı sürmüş 3 qadının Azərbaycana gətirildiyi bildirilir

Yayımlandı: 1 İyun 2023 23:00

XİN daha 2 qadının ölkəyə gətiriləcəyini deyib

İraqda məhbus həyatı sürmüş və hazırda cəza müddəti bitmiş 3 qadın Azərbaycana gətirilib.

Bu barədə Azərbaycan Xarici İşlər Nazirliyinin (XİN) yaydığı məlumatda bildirilir.

Nazirlik qeyd edib ki, növbəti mərhələdə daha 2 nəfər cəza müddəti bitmiş Azərbaycan vətəndaşının gətirilməsi nəzərdə tutulub.

Nazirlik qeyd edib ki, İraqda həbsdə saxlanılan Azərbaycanın qadın vətəndaşlarının mərhələli şəkildə gətirilməsi istiqamətində müvafiq işlər davam etdirilməkdədir:

“Bununla əlaqədar olaraq, İraqın aidiyyəti dövlət qurumlarına müvafiq müraciətlər ünvanlanıb”.

İndiyə qədər sözügedən qadınların 288 övladının artıq Azərbaycana geri qaytarıldığı vurğulanır.