Daha bir partiya özünü buraxdı
Yayımlandı: 12 May 2023 13:26
Sədr müavini səbəbi açıqlamayıb
Milli Konqres Partiyası fəaliyyətini dayandırıb.
Bu barədə partiya sədrinin müavini Hikmət Şirinov açıqlama yayıb.
Partiyanın sədri İxtiyar Şirin 1992–1993-cü illərdə Azərbaycanın Baş prokuroru olub.
Partiya isə 1998-ci ildə yaradılıb.
2022-ci ilin noyabrında İ.Şirin vəfat edib.
Bununla da sədrləri vəfat etmiş partiyalardan üçüncüsü də özünü buraxıb.
İndiyə qədər sədrləri Araz Əlizadə, Çingiz Dəmiroğlu vəfat etdikləri üçün Sosial-Demokrat və Təkamül partiyaları fəaliyyətlərini dayandırmaq haqda qərar vermişdilər.
2022-ci ilin dekabrında Milli Məclisin “Siyasi partiyalar haqqında” Qanunu III oxunuşda qəbul edib.
Daxili və xarici etirazlara rəğmən, Prezident İlham Əliyev 2023-cü ilin yanvarında qanunu təsdiqləyib.
Yeni qanunun narazılıq doğuran maddələri sırasında partiyaların 5 min üzv toplaması və onların hər birinin reyestrdən keçirilməsi xüsusi yer tutur.
Son bir neçə ayda 20 partiya özünü buraxıb.
