Azərbaycanda karantin yenə uzadıldı
Azərbaycanda xüsusi karantin rejimi oktyabrın 2-dək uzadılıb.
Baş nazir Əli Əsədov bununla bağlı iyunun 23-də qərar imzalayıb.
Azərbaycanda karantin müddəti iyulun 1-də başa çatırdı.
Baş nazirin qərarında bu belə izah edilib: “Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə…”.
Koronavirus pandemiyası ilə bağlı Azərbaycanda 2020-ci ilin martından karantin rejimi elan edilib. Bu arada onun müddəti bir çox dəfə uzadılıb. Yoluxma sayından asılı olaraq zaman-zaman rejim sərtləşdirilsə də, sonra yenə yumşaldılıb.
Ümumdünya Səhiyyə Təşkilatı (ÜST) bu pandemiyanın başa çatdığını elan edib. Azərbaycanın özündə də son aylar bu virusa yoluxma kəskin azalıb. İyunun 20-də cəmi 7 şəxsin koronavirusa yoluxduğunun təsdiqləndiyi açıqlanıb. Son sutkada bu virusa yoluxanlardan heç kimin ölmədiyi bildirilib.
Koronavirusla bağlı 2020-ci ilin yazından Azərbaycanın quru sərhədlərində gediş-gəliş məhdudlaşdırılıb. Bu hal hələ də davam edir. Ölkənin bir sıra müxalifət partiyaları pandemiyanın başa çatdığını vurğulayaraq məhdudiyyətlərin götürülməsini tələb edir.
2019-cu ilin sonlarında dünyada yeni koronavirus aşkar edilib. 2020-ci il martın 11-də ÜST koronavirusu pandemiya elan edib. Dünyada sürətlə yayılan bu virusdan indiyə qədər 7 milyona yaxın şəxsin vəfat etdiyi açıqlanıb. Azərbaycanda isə iyunun 23-nə qədər 830 mindən çox insanın bu virusa yoluxduğu, onlardan 10 min 200-dən çoxunun vəfat etdiyi bildirilir.
