Polşa prezidenti Rusiya ilə bağlı güzəştlərin əleyhinə olduğunu bildirib
Anjey Duda hesab edir ki, Rusiya Federasiyası “2008-ci ildən bəri təcavüzkar hərəkətlər edir və imperiya siyasəti aparır”. Polşa prezidenti Anjey Duda Rusiya Federasiyasına münasibətdə güzəştlərə qarşı olduğunu bildirib.
O, bazar ertəsi İvano-Frankivsk vilayətinin Quta kəndində Lyublin üçbucağının (Litva, Polşa, Ukrayna) liderlərinin görüşünün yekunlarına dair mətbuat konfransında deyib: “Mən Rusiya ilə bağlı istənilən güzəştin əleyhdarıyam”. .
“Rusiya geri addım atmalıdır” – deyən Duda Rusiya Federasiyasının “2008-ci ildən bəri təcavüzkar hərəkətlər etdiyini və imperiya siyasəti yürütdüyünü” bildirib. “Rusiyanın son hərəkətləri, Ukraynanın sərhədlərində, eləcə də Polşa-Belarus sərhəddində hərbi mövcudluğunun intensivləşməsi bütün NATO müttəfiqləri kimi, bizi də narahat edir.
“Hesab edirəm ki, biz qabaqlayıcı addımlar atmalıyıq və Rusiya tərəfinin Ukrayna ilə bağlı vəziyyətdə qəti şəkildə geri çəkilməsini tələb etməliyik. Yalnız belə mövqe münaqişənin olmayacağına gətirib çıxara bilər”, – Polşa lideri bildirib.
Son zamanlar Qərb ölkələrində, eləcə də Kiyevdə Rusiyanın Ukraynaya mümkün müdaxiləsi ilə bağlı iddialar səslənir. Rusiya prezidentinin mətbuat katibi Dmitri Peskov bu cür məlumatları boş və əsassız olaraq gərginliyin artmasına xidmət etdiyini bildirib. Eyni zamanda, o, bu cür bəyanatlara haqq qazandırmaq üçün təxribatların baş verəcəyini istisna etməyib və Ukraynanın cənub-şərqindəki böhranın güc yolu ilə həlli cəhdlərinin ən ağır nəticələrinin olacağı barədə xəbərdarlıq edib. Peskov həmçinin əmin edib ki, Moskva Normandiya formatına və Minsk razılaşmalarına sadiq qalaraq Kiyevə Donbassdakı münaqişənin həllinə kömək etmək üçün əlindən gələni edir.
Qeyd edək ki, “Lublin üçbucağı”nın yaradılması 2020-ci ildə Litva, Polşa və Ukrayna xarici işlər nazirlərinin Lyublin şəhərində (Polşa) görüşündən sonra elan edilib. Yeni əməkdaşlıq platforması üç ölkənin Şərq Tərəfdaşlığının inkişafında (Aİ-nin Azərbaycan, Ermənistan, Belarus, Gürcüstan, Moldova, Ukrayna ilə yaxınlaşma təşəbbüsü), pandemiya ilə effektiv mübarizədə, Ukraynanın Avropa və Avro-Atlantik istəkləri və bu ölkənin Üç Dəniz Təşəbbüsü ilə əlaqələri, eləcə də iqtisadiyyat sahəsində əməkdaşlığına imkanlar yaradır.
