FHN partlamış sexin dağıntıları altından daha iki nəfərin cəsədini tapıb
Yayımlandı: 16 Yanvar 2024 17:32
Ölənlərin sayı 8 nəfərə çatıb
Fövqəladə Hallar Nazirliyinin (FHN) xilasediciləri yanvarın 15-də partlayış baş verən sexin dağıntıları altından daha iki nəfərin cəsədini tapıblar.
FHN Mətbuat xidmətindən bildirilib ki, bununla hadisə qurbanlarının sayı 8 nəfərə çatıb.
Avropa Şurasının baş katibi Mariya Peyçinoviç Buriç “X” platformasında Bakıda yanvarın 15-də baş vermiş partlayış və yanğının qurbanlarının doğmalarına, habelə Azərbaycan hakimiyyətinə başsağlığı verib:
“Bakıda baş vermiş partlayışdan kədərlənmişəm. Duyğularımı qurbanlara, onların doğmalarına və Azərbaycan hakimiyyətinə çatdırmaq istəyirəm”.
Yanvarın 15-də paytaxtın Binəqədi rayonu, S.S.Axundov küçəsində yerləşən mebel sexində partlayış olub. Partlayışdan sonra yanğın çıxıb. Hadisə nəticəsində 24 nəfər yaralanıb, 9 nəfər həyatını itirib.
Faktla bağlı Cinayət Məcəlləsinin 225.3 (yanğın təhlükəsizliyi qaydalarını pozma – ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq – ehtiyatsızlıqdan iki və daha çox şəxsin ölümünə səbəb olduqda) maddələri ilə cinayət işi açıldığı bildirilib.
