Əhəd Abıyev daha icra başçısı deyil
Yayımlandı: 17 İyul 2023 21:32
Ölkə başçısı yeni sərəncam imzaladı
Əhəd Abıyev Daşkəsən Rayon İcra Hakimiyyətinin başçısı vəzifəsindən azad edilib.
İyulun 17-də Prezident İlham Əliyev bununla bağlı sərəncam imzalayıb.
Əhəd Abıyev 2011-ci ildən Daşkəsən Rayon İcra Hakimiyyətinin başçısı vəzifəsində çalışır.
O, 2018-ci ildə 2-ci dərəcəli “Vətənə xidmətə görə” ordeni ilə təltif edilib.
Yeni Azərbaycan Partiyasının üzvü olan Əhəd Abıyev I, II və III çağırış Azərbaycan Milli Məclisinin deputatı olub.
Əhəd Abıyevin adı sosial şəbəkələrdə və mediada çox hallanırdı. Onun 2016-cı ildə Daşkəsəndə 9 noyabr Bayraq Gününə həsr olunan tədbirdəki hərəkəti uzun müddət müzakirə predmeti olub.
Söhbət Əhəd Abıyevin güclü yumruq zərbəsi ilə şifer lövhəsindən hazırlanmış Ermənistanın bayrağını vurmasından gedir.
Amma sonradan məlum olub ki, icra başçısının yumruqla vurduğu Ermənistanın yox, Kolumbiya Respublikasının bayrağı olub.
